|
Ефим Ильич Уляшев
На Великую Отечественную войну призван Троицко-Печорским РВК 25 августа 1941 г.
«Книга памяти Республики Коми», том 4, стр. 274
Батьö Ефим Ильич Уляшев – сиктса тöдысьяс рöдысь. Быдмис уна челядя семьяын. Сиктсаяс серти, вöлi грамотаа мортöн. Вӧлі гражданскöй да Отечественнöй войнаяс вылын. Первой белöйяс мобилизуйтлöмаöсь, сэсся вермöма пышйыны, воюйтöма Будённӧйлöн коннöй армияын. Гортас воöм бöрын кыйсьöма. Лöсьöдiс семья. Колхозъяс артмöм бöрын пырис колхозö. Гожöмъяснас колхозын мырсис, тöвъяснас кыйсис, Мылдiнса вöръясöдз быд тöв ветлывліс. Сэсся ыджыд война. Воис ловйöн. Бара колхоз удж. Мамö – Агния Ефимовна. Öтка мамлöн ныв. Кутшöмкö кадö овлiс Ефимъяс семьяын, отсасис гортулас, ёна кажитчис сюсьлуннас, сямлуннас, вежавидзöмнас да зiльлуннас Ефим бать-мамлы, чой-воклы, обыслы. Шуисны гöтравны Епима-Агнияöс. Мам колхозö пырöм бöрын уджалiс МТФ-ын, Егор Тима бригадаын. Чужисны ныв-пи. Лиза – 1925-öд воын, Анна – 1927-ын, Виталий – 1929-ын, Настя – 1933-ын, ме – 1935-ын, Öлексей – 1939-ын. Войнаöдз, кöть и эз озыр вöв олöмыс, но йöзысь лёка эг олöй. Пансис война. Батьöс нуисны, нуисны и кык дядьöс – Васьöс да Степанöс. Бать война кöртö тöдiс нин да зэв серьёзнöй вöлi, а дядьяс шмонитісны: «Мамö, эн пов. Ми Гитлертö ошкöс моз киясöдыс да кокъясöдыс сёрйö пысалам да ваям». Асьныс, коньöръяс, эз воны. Бать воис ёна доймалöмöн, но нулiсны на Украинаö. Суд вылö. Кутшöмкö Иудаöс судитiсны да, свидетельö. Эз дыр и ов, сьöлöмыс сувтiс. Эновтiс таладор югыдсö, дона гöтырсö, муса ныв-писö. Война воясад сиктыд кушмис: кодкö усис ли вошис тыш мунан ыбъяс вылас, кодкö пöдiс-доймис вöр удж вылын, а кодкö и сьöкыдла, висьöмла, тшыгла кулiс. Кольысьяслы лоис уджавны ас пыддиныс и батьяс, дядьяс, вокъяс пыдди. Лизалы – 17 арöс, Анналы – 15, Виталийлы – 13. Воссис сир вийöдан база, и Лиза сэнi мыр бертiс. Дiасёръяын лоис вöр пункт, и куим чоя-вока – Лиза, Анна, Виталий – кайисны сэтчö. Ми Öлексейкöд колим гортö. Мам лун и вой удж вылын. Öлексейöс пачö сюя, ачым пессö мычала – сiдз пачнымöс ломтам. Мöс дорö куимысьöдз петала, 6 арöса öд на, киöй мудзö. Öлексей вокö куима, жалитö: «Пырав, Миш, шойччышт да выльысь петав». А сэсся и мöснымöс мырддисны, кöть фронтӧвик семьяыдлысь оз вöлi позь. Мамъяс 20 вöлöн Визъёльö турунла каясны, лун öтарö, лун мöдарö, сэсся Дiасёръяö сiйö турунсö кер кыскалан вöвъяслы катöдасны. А ми сартаса биöн горт олам! Миянö тшӧкыда ас тшöтшъяяс волывлiсны: Семен Лидьö, Митрей Иван Кöсьта да мукöд. Асьным мойдъяс лöсьöдлам да öта-мöдлы сiсь картупель папурка тяпкöдлiгмоз висьтавлам. Öнiя челядь оз тöдны, кутшöм сiйö папуркаыс. Тулыснас шепасян картупель муяс вылын, корсян кольöмъяссö. Сюрö кö, ёна и нимкодясян. Картупельыс сьöд, кучикыс усьö нин, но пытшкöсас крахмал. Вот сэтшöмсö мамъяс, эм кö, гудраласны турун сора, пызьторъя няньшомö, пöжаласны нянь. А абу кö пызьыс, сiдзи и вӧчасны папурка (сöчöн), да кöрт пач вылын и пöжалам челядь чукöр. Воис Победа. Враглысь сюрсалысö чегисны, вермисны. Сiйö лунсö эз уджав некод… Кодкö радлö, кодкö бöрдö. Быд керкаö сьмерт пырис. Айловъяс воисны, но колхозад кольччысьыд этша лоис, Вöрпунктъясö да кытчö мунiсны. А 1946–1947-öд воясас тыл пыкысьяс да челядь медуна кулiсны-бырисны. Война бöрас на миянлы бура ёна лоис уджавны. Сiтан кадж вылын кучикыс весиг эз вöв. Доддясьны на ог вермöй. Нывбабаöс специальнö сетлiсны, мед миянлысь вöвъяснымöс доддялас-лэдзалас. Тулысбыд агсасям, гырысьджыкъяс плугаралöны. Гожöм воас – силос вылö турун нöбъясöн кыскалам. Кымынкö нöб и тöдлiсны жö жебиник мышъясным! Ар воас, бара агсасьöм, öти нимкодьлун – вöвъяссö ю дорö юктавны гöнитöдлыны да купайтчыштны. Пув вотлiм, шеп öктылiм, картупель керим, овощехранилищеын бöрйысим, пес школалы да интернатлы вöчим… Велöдчи медводз асланым семилеткаын, сэсся Кировын. Лои агрономöн. Уджалi Кировас, гöтраси. 1967-öд воын локтiм гортö! Пыри уджавны Помöсдiн леспромхозса Ягкöдж лесопунктö. Вöлi мастерöн. Йöзыс и öнi на ошкöны. Эм уна Почёт грамота да ошкана гижöд, лэдзлывлiсны районнöй газетö. М.Е. Уляшев |